Новата, трета по ред европска сезона за ракометниот клуб Алкалоид почнува викендов со првиот дуел од двомечот за пласман во групната фаза на ЕХФ Европската лига.

Противник на освојувачот на ЕХФ Европскиот куп за минатата сезона во овој двомеч е тимот со највисокиот рејтинг меѓу екипите што играат во квалификациската фаза – ТСВ Хановер Бургдорф, еден од најсилните германски клубови во последните неколку години.

Денеска ќе се игра првиот натпревар од 17:00 часот во Хановер, а реваншот е закажан на 6 септември во Скопје, во салата „Автокоманда“ со почеток од 19.30 часот.

Тренерот на Алкалоид, Кирил Лазаров за денешниот меч ќе може да смета на 16 ракометари:

– Кизиќ, Џонов, Тордарсон, Маркоски, Серафимов, Карасманакос, Стојковиќ, Ѓоргиев, Галевски, Велковски, Ивановски, Не. Костески, Петковски, Д. Митев, Борзаш, Аларов.

Поради повреди, Лазаров не може да смета на Марко Митев и Никола Костески. Судии на денешниот дуел се Португалците Рубен Маја и Андре Нунеш, додека ЕХФ делегат е Пер Олесен од Данска.

– Ние како клуб одлучивме да излеземе од комфорната зона и да играме во Европската лига, по оној освоен ЕХФ Куп во кој има силни противници, тоа може да се види по листата и оваа година. Сакаме да одиме чекор понапред, прифативме ризик. Имавме малку незгодна ждрепка, добивме бундеслигаш. Успеав по ждрепката да изгледам неколку мечеви и увидов зошто во текот на Бундеслигата во поголемиот дел беа на првото место. Се работи за систем со екстра-квалитетен тренер, бивш селектор на репрезентацијата на Германија, на секое зошто има затоа. Ривалот е фаворит, но ние ќе се бориме и нема да се предадеме – вели Лазаров.

Aлкалоид пристигна во Германија, против Хановер ја започнува европската сезона