Иднината на ТикТок во Соединетите Американски Држави зависи од клучен договор според кој алгоритмот на апликацијата, кој им прикажува содржина на корисниците, ќе биде копиран и преобучен исклучиво врз основа на податоци од американски корисници, објави Би-Би-Си.

Овој потег доаѓа откако претседателот Доналд Трамп објави договор за избегнување на забраната за апликацијата, под услов кинеската матична компанија ByteDance да ги продаде своите американски операции. Белата куќа потврди дека технолошкиот гигант Oracle ќе го надгледува системот за препораки на ТикТок, додека бизнисот ќе го управува ново заедничко вложување со американски инвеститори.

Според договорот, Oracle ќе преземе голема улога во обезбедувањето на безбедноста на апликацијата за американските корисници, вклучувајќи ревизија на изворниот код, проверка на системот за препораки и негова реконструкција користејќи само податоци од САД. Податоците на околу 170 милиони американски корисници веќе се хостирани на серверите на Oracle во рамките на проектот „Тексас“.

Вредноста на договорот се проценува на милијарди долари, а во него учествува и компанијата за приватен капитал „Силвер Лејк“. Новото вложување, според Белата куќа, ќе вклучува „патриотски инвеститори“ и членови на одборот со искуство во сајбер безбедноста.

Иако администрацијата во Вашингтон го претставува договорот како победа за американските корисници, аналитичарите предупредуваат дека промените би можеле да влијаат негативно врз искуството на ТикТок. Според експертите, ако алгоритамот само за САД ги изолира американските корисници од глобалната содржина, тоа може да ја намали привлечноста на апликацијата за креатори, брендови и инвеститори.