После само два одиграни натпревари за одбојкарскиот клуб Струмица во ЦЕВ купот, македонскиот репрезентативец Александар Љафтов има нов предизвик во својата клупска кариера.

Љафтов одлучи оваа натпреварувачка сезона 2024/2025 да ги брани боите на грчкиот одбојкарски клуб ПАОК на чија клупа е нашиот тренер Јошко Миленкоски.

Во својата професионална кариера настапуваше за Работнички, Галатасарај, Рибница, Анагениси Деринеја, Саут Гас Спортинг, Стеауа Букурешт, Анкара, Младост (титула во хрватскиот шампионат), со настапи во ЦЕВ Лигата на шампионите.

Па, се пресели во Пазарџик со кој дојде до пехарот во бугарското првенство, два пати дојде до трофејот во националниот куп и еднаш и во Суперкупот.

Во сезоната 2021/2022 беше дел од италијанската Равена собирајќи искуство во една од топ европските лиги. А во следните две сезони (2022-24) играше во Азија за Ал Индишам (Саудиска Арабија) и Ал Васл (ОАЕ).

– Многу сум среќен што се приклучив на клуб каков што е ПАОК. Се надевам дека веднаш ќе се прилагодам во тимот и можеме да постигнеме големи работи, играјќи многу убава одбојка. Исто така, среќен сум што повторно ќе работам со првиот тренер што го имав во мојата кариера, Јошко Миленкоски, многу добро се познаваме. Едвај чекам да започнат официјалните натпревари – вели Љафтов за клупскиот сајт.

Најдобриот македонски одбојкар по два натпревари си замина од Струмица