Ал Хилал од Саудиска Арабија се врати во игра со голема понуда за нигерискиот фудбалер Виктор Осимен, додека Галатасарај станува сè понетрпелив поради застојот во преговорите за трансферот на напаѓачот на Наполи.

Според „Кориере дело Спорт“, играчот на италијанскиот клуб од Неапол доби понуда од 40 милиони евра по сезона за три години, со опција за четврта, што вкупно би изнесувало 160 милиони евра.

Овој договор би го направил Осимен еден од најплатените фудбалери во светот.

Наполи е подготвен да се раздели со напаѓачот доколку некој тим ја активира неговата откупна клаузула за странски клубови, која изнесува 75 милиони евра.

Осимен моментно е на летен одмор, а по истиот ќе одлучи каде ќе игра следната натпреварувачка сезона.

Минатата сезона како позајмица во Галатасарај ја освои титулата во турската Суперлига каде запиша 26 голови и пет асистенции.