Претседателот на партијата Левица, Димитар Апасиев со изборот на Африм Гаши за претседател на Собранието очекува косовизација на државата. Ваква изјава тој даде пред денешната конститутивната седница на која ќе се верифицираат мандатите на новите пратеници и ќе се избере претседател на Собранието, кој, според договореното помеѓу ВМРО-ДПМНЕ и „Вреди“ ќе биде Африм Гаши, довчерашниот претседател на Алтернатива.

На новинарско прашање дали ќе го поддржат изборот на Гаши, тој одговори дека тие би дале поддршка на ВМРО-ДПМНЕ Албанец да не биде претседател на Собранието.

– На ВМРО-ДПМНЕ ќе им дадеме поддршка на невидено само Албанец да не биде претседател на Собранието. Противуставно е да се претседава на друг јазик во Собранието, а тоа значи дека и натаму ќе се применува илегалниот закон за двојазичност – рече Апасиев.

На прашањето што доколку Гаши претседава на македонски јазик, Апасиев одговори „ако претседава на македонски јазик може да правиме муабет“.

Претседателот на ЗНАМ, Максим Димитриевски рече дека од овој парламентарен состав очекуваат многу и им посака среќа.

– Како потенцијален партнер во идната власт ќе дадеме придонес во политичкото делување. Разговараме за имплементација на нашите програмски определби во идната власт – рече Димитриевски.

Изјава пред седницата даде и Ријад Шакири од „Вреди“, кој е син на Хисни Шакири, кој во 2001 го напушти Собранието за да оди во УЧК.

На прашањето дали очекува поддршка од ДУИ за изборот на Гаши за спикер, тој одговори дека очекува поддршка од ДУИ и од „Европскиот фронт“, бидејќи Алијанса за Албанците во минатиот собраниски состав гласале за Талат Џафери од ДУИ за претседател на Собранието, бидејќи бил прв Албанец претседател на Собранието.

Лидерот на ДУИ, Али Ахмети и лидерот на ДПА, Мендух Тачи одбија да одговорат дали ќе го поддржат изборот на Гаши.