Во Вишиот суд во Белград, вчера продолжи судењето на режисерот и учител по глума Мирослав Мика Алексиќ, кој е обвинет дека во своето училиште за глума вршел полово вознемирување и сексуално малтретирање на своите студентки. Актерката Милена Радуловиќ повторно сведочеше за своето искуство со Алексиќ.

Адвокатот на обвинетиот, Зоран Јаковлевиќ бил парично казнет за однесувањето за време на судењето, а самото судење било прекинато. Имено, адвокатот почнал да ѝ вика на судијката и да се жали дека Радуловиќ го поправала откако погрешно ги цитирала нејзините зборови.

Српскиот медиум „Блиц“ објави неколку од прашањата кои адвокатот ѝ ги поставил на актерката. Меѓу другото, тој ја прашал што ќе се случело доколку го напуштела училиштето за глума.

„Ќе зборуваше за мене на најлош начин, ќе ме манипулираше, се исплашив за мојата иднина“, одговорила Радуловиќ, велејќи дека не можела да му се спротивстави на Алексиќ.

Тогаш Јаковљевиќ изјавил: „Таа вели дека се сеќава кога имала хулахопки, а кога не, бидејќи Мика велел: ‘Сега е многу полесно’. Како ја сфаќате таа реченица?”

Актерката одговорила: „Можеби му требаше помалку труд за да ме силува“.

„А зошто доаѓавте без гаќички за да му олесните? За да може полесно да ве силува?“, продлжил адвокатот.

Судијата го отфрлил ова прашање, како и неколку други прашања. Адвокатот потоа почнал да се смее и рекол: „Навистина не знам како да го бранам“.

Потоа ја прашал Радуловиќ дали таа „му помогнала на Алексиќ да ѝ ја соблече долната облека без да ја оштети“.

„Секако дека не му помогнав. Моите раце беа на неговата глава, се обидував да го оддалечам. Не успеав во тоа“, му одговорила актерката.

Адвокатот ги анализирал и објавите на актерката на Фејсбук и ја прашал како може да објавува статуси дека сè е во ред и дека е среќна додека ѝ се случуваат такви работи. Таа тогаш рекла дека сакала да ги измами своите најблиски, бидејќи размислувала за самоубиство.