Најмалку 40 мигранти од Хаити загинаа откако бродот со кој патувале се запалил соопшти Меѓународната организација за миграција (ИОМ) на Хаити, пренесува Ројтерс.

Бродот, кој превезувал над 80 луѓе, тргнал од Форт Сен Мишел на северот на Хаити и се упатил кон островите Туркс и Каикос, се вели во соопштението на ИОМ, повикувајќи се на миграциската управа на карипската држава.

41 мигрант го преживеа пожарот и беа спасени од крајбрежната стража на Хаити. Во моментов добиваат грижа и поддршка од ИОМ, а 11 од нив се пренесени во најблиската болница, се вели во соопштението.

„Луѓето на бродот користеле кибритчиња за да запалат свеќи во ритуал за да побараат безбедно поминување, со што бурињата полни со бензин се запалиле и експлодирале“, изјавил Хералд Жан-Хенри Петит, кој раководи со канцеларијата за цивилна заштита на северот на Хаити.