32-годишен жител на Скопје ќе одговара откако, возејќи пијан, вчера предизвикал сообраќајна несреќа во населбата Кисела Вода, во која е тешко повредена недолжна жена, соопшти Обвинителството, од каде велат дека сепак не побарале осомничениот да оди во притвор, туку само да му се одземе возачката дозвола.

„Несреќата се случила вчеравечер, кога осомничениот, под дејство на алкохол од 1,34 промили, управувал туѓ автомобил „Фолксваген пасат“ по улицата „Христо Татарчев“ во општина Кисела Вода. И покрај тоа што бил свесен дека неговото однесување може да предизвика штетни последици, се согласил со ризикот. Тој преминал на спротивната коловозна лента наменета за возила кои се движат од спротивната насока и со предниот лев страничен дел од возилото удрил во автомобил „Фиат стило“ кој доаѓал од спротивна страна. Во судирот со телесни повреди се здобила сопатничката од автомобилот „Фиат стило“, пишува во соопштението.

Надлежниот јавен обвинител до судија на претходна постапка предложил да се изрече само мерка на претпазливост – привремено одземање на возачката дозвола на осомничениот, како и забрана за издавање нова. Како што велат од Обвинителството, ваквата мерка се предлага „поради потребата осомничениот да не учествува во сообраќајот додека трае постапката, особено имајќи предвид дека неговото неодговорно постапување резултирало со повреда на друго лице“.