Жителите на планинското село Луковица на Сува Гора велат дека патот не е прооден и дека се отсечени поради снежната покривка. Снегот, според нив, почнал да врне во петокот околу 16:30 часот, а се соочиле и со повеќечасовен прекин на електричната енергија, пренесува МИА.

– Снегот врнеше цела вечер и цел ден денес. Последен пат кога бев излезен околу 17 часот патот не беше прооден. Сега околу 19 часот има околу 40 сантиметри. Струјата беше во прекин од вчера во 19 часот до денес до 14 часот- изјавил Ќирко Милошевски, жител на селото и член на месната заедница.

Околу пладне, градоначалникот на Желино, Блерим Сејдиу на социјалните мрежи постави фотографии и објава дека се чистат патиштата во планинските села.

„Нашите машини работат на терен чистејќи ги патиштата во вечерните часови. Бидејќи снежните врнежи сè уште не престанале, апелираме до граѓаните да не ги користат возилата без потреба, освен во случаи кои се апсолутно неопходно“, напиша Сејдиу.