Францускиот актер Жерар Депардје призна пред судот дека ја допрел жената која го обвини за сексуален напад, но нагласи дека тоа не е напад, додавајќи дека сите груби коментари ѝ ги дал затоа што бил нерасположен.

Икона на француската кинематографија се соочува со сè поголем број на обвинувања за сексуално вознемирување во последните години. Тој ги отфрли сите обвиненија, а ова е прв случај за кој му се суди.

„Ја фатив за бедрата“, рече Депардје, признавајќи физички контакт со филмската сценографка Амели К. и рече дека не ѝ кажал на полицијата кога го испрашале.

„Ја фатив за бедрата за да не паднам бидејќи бев навистина вознемирен поради неа, поради жештините, беше петок и бев навистина уморен“, вели актерот.

Збунет и често отстапувајќи од темата, Депардје пред судот објасни дека ѝ бил лут на Амели К. поради нејзината работа. Тој рече дека таа лошо ја завршила работата, поради што била шокирана.

„Не гледам зошто би допирал жена“, изјави тој пред судот, додавајќи дека во тоа време бил толку дебел што некои од работите за кои е обвинет би биле невозможни.

Актерот вели дека непријатните коментари што ѝ ги упатил не биле насочени лично кон неа, туку се однесувале на нејзината работа.

Доколку биде прогласен за виновен, Депардје може да се соочи со затворска казна до пет години и парична казна од 75.000 евра.

Судењето, кое се очекува да трае најмалку три дена, првично требаше да се одржи минатиот октомври, но беше одложено поради лошата здравствена состојба на Депардје. Инаку, судењето започна во понеделникот.