Економскиот шок предизвикан од здравствената криза задава поголем удар врз жените, бидејќи тие се повеќе застапени во сериозно погодените сектори на услуги, малопродажба, туризам и угостителство, предупредува ММФ. Од таму додаваат дека коронавирусот може да го загрози напредокот постигнат од жените во последните три децении во намалувањето на економскиот јаз со мажите.

„Во САД, во периодот меѓу април и јуни, невработеноста на жените беше за два проценти поголема од таа кај мажите”, наведе извршниот директор на ММФ, Кристалина Георгиева.

Проценките на ММФ покажуваат и дека жените во периодот на криза извршуваат повеќе неплатени домашни работи од мажите, околу 2,7 часа дневно.

По укинувањето на рестриктивните мерки, на жените им треба повеќе време за да се вработат, велат официјалните претставници на ММФ, а девојките во многу земји во развој мораа да го напуштат училиштето и да почнат со работа за да ги пополнат буџетите на домаќинствата.