Македонскиот културно информативен центар во Тирана во саботата беше срцето на интернационалната уметност во Тирана, обединувајќи седум жени-уметници од Македонија, Албанија, Словенија, Украина, Белгија и Италија, објави денеска КИЦ.

Специјална гостинка на вечерта беше познатата македонска актерка Ивана Павлаковиќ, која прочита избор поезија од авторки од Македонија, како и од други земји учеснички.

Настанот го отвори Радмила Стојмировска – конзул во Амбасадата на Македонија во Тирана, со силна порака за значењето на културната дипломатија како моќен инструмент за претставување на културата и идентитетот на една земја.

Директорката на КИЦ Тирана, Ема Попивода – воедно и кураторка на изложбата – истакна дека овој значаен настан го поставува Центарот високо на пиедесталот на културните случувања во Тирана.

Меѓу присутните беа и бројни амбасадори и претставници на дипломатскиот кор.

Изложбата од слики, скулптури и фотографии ќе биде отворена до 31 мај.