Жена од Тетово на суд бара 100 илјади евра отштета од Центарот за јавно здравје-Тетово, зашто во 2021 година во овој Центар, здравствен работник ѝ зел брис за испитување на ковид-19, со истото стапче што претходно го искористил за да земе брис за ковид на друга пациентка – а којашто добила позитивен резултат на коронавирусот. Пет дена подоцна позитивна на ковид била и тужителката, на која во носот ѝ било брцнато стапчето од пациентката што се тестирала пред неа.

Во писмената тужба како и на расправа пред судот, адвокатот на тужителката наведе дека на 1 март 2021 година, тужителката дошла во Центарот за јавно здравје Тетово на контрола, но настаната е груба грешка и небрежност од страна на вработен во Центарот. Имено, во 9 часот и 40 минути тужителката имала закажано испитување за ковид-19, додека пред неа имало помлада девојка што чекала ред.

Откако ѝ бил земен брис на девојката што била пред тужителката, таа чекала седната пред неа ред за да ѝ се земе брис од нос и грло.

Вработениот во Центарот донел стапче за земање брис и започнал да ѝ зема брис, а откако завршил, тужителката му посочила дека нејзината епрувета со стапче воопшто не е отворена, а стапчето со кое ѝ бил веќе земен брисот било искористено од претходната пациентка, гласи тужбата по којашто одлучувал Основниот суд Тетово, а до која дојде „Слободен печат“ со користење на Законот за слободен пристап до информации од јавен карактер.

Тужителката го пријавила случајот и кај тогашниот директор на Центарот за јавно здравје и веднаш заминала во друга установа да направи брз ковид тест кој дента ѝ бил негативен.  Но, таа била свесна дека вирусот навлегува во телото и дава знаци на болест после неколку дена, па повторно се испитала за 5 дена, на 5 март 2021 година и резултатот ѝ бил позитивен.

Во тужбата се наведува дека после ова, жената одела на други рентген испитувања, стравувала за сопственото здравје, неколку пати користела продолжено боледување, имала отежнато дишење, срцебиење, чувствувала силен страв за сопствениот живот и западнала во психичка криза и делириум. До Основниот суд Тетово жената доставила и вештачење од областа на судската медицина, ама судот не му поклонил верба на ова вештачење од причини што мислењето на вештакот било засновано само базирано на болнички извештаи.

-Вака доставеното вештачење е штуро и од него судот не може со сигурност да утврди дека кај тужителката се пренела инфекцијата со коронавирус од пациентката пред неа. За да се утврди дали таа се заразила со ковид 19 од пациентката пред неа, треба да се знае историјата на таа пациентка и вирусот со кој била таа заразена, поткрепено со соодветни лабораториски анализи и докази што недостасува во вештачењето од вешто лице, смета Основниот суд Тетово.

Од Државниот здравствен и санитарен инспекторат за „Слободен печат“ потврдија дека извршиле вонреден инспекциски надзор во Центарот за јавно здравје Тетово на 18 март 2021 откако адвокат на тужителката доставил писмена претставка до нив. Вработениот бил казнет за грешка од небрежност и 6 месеци земал 20 проценти помала плата.

При инспекцискиот надзор извршен е увид во „Мој Термин“ и е констатирано дека е направена грешка од страна на вработеното лице. Од страна на директорот на здравстверната установа, на 14.03.2021 година била формирана Комисија за дисциплинска постапка која утврдила дека е сторен дисциплински престап и е  донесено  решение за извршување на парична казна во времетраење од 6 месеци, велат од ДСЗИ за „Слободен печат“.

Адвокатот на вработениот пак, пред Основниот суд Тетово тврдел дека единствената цел на пациентката ѝ била да добие пари, тужбата содржела неточни наводи, а тоа што пациентката била позитивна на ковид 5 дена после земањето на брисот во Центарот за јавно здравје Тетово, не било поради евентуална грешка на вработениот, туку зашто членови на нејзиното семејство, свекорот и свекрвата со кои заедно живеела во истото домаќинство, биле позитивни на ковид уште на 27 февруари 2021.

Основниот суд Тетово ја отфрлил тужбата на пациентката, поради немање неспорни докази дека  таа била заразена со корона при земањето на брисот од страна на вработениот во Центарот за јавно здравје Тетово, но и поради застареност. Жената била задолжена да му плати на вработениот судски трошоци од 41.400 денари.

„Тужителката не докажа дека има причинско-последична врска меѓу дејствието на тужениот и евентуалната претрпена нематеријална штета кај неа. Тужителката има обврска да докаже дека претрпела нематеријална штета, како и причинско-последична врска од дејствијата на тужениот и евентуално настанатата штета, но не успеа да докаже дали и со кој интензитет претрпела душевна болка и дали претрпела страв поврзан со дејствијата на тужениот“, смета Основниот суд Тетово. 

Сепак, минатиот месец Апелациониот суд Гостивар ја укина ваквата пресуда и го врати на повторно одлучување предметот во кој жена од Тетово на суд бара 100 илјади евра нематеријална отштета зашто по грешка во Центарот за јавно здравје во Тетово во 2021 година ѝ зеле брис за ковид, со стапче од тестот кое претходно било искористено на друга пациентка која била ковид-позитивна.