Во знак на поддршка за студентската блокада на Универзитетот во Нови Сад, српско земјоделско здружение најави дека ќе организира готвење на гулаш за студентите, пренесува „Данас“.

„Земјоделците ќе им помогнат и ќе ги поддржат студентите со организирање готвење гулаш за нашите академски граѓани и борци за нормално и уредно општество, на терените на Универзитетот во Нови Сад во сабота, 21 декември, со почеток во 9:30 часот“, се вели во соопштението на Иницијативата за опстанок на српските земјоделци, која е едно од повеќе обединети земјоделски здруженија кои деновиве организираат протести и блокади на патишта низ Србија.

Од почетокот на студентските блокади, земјоделците апелираат за помош во вид на храна и потребни намирници, но и за координирана поддршка во бројност со луѓе на блокадите.

Пред една недела, претставници на Здружението на млекопроизводители „Наше млеко – Мачва“ ги посетија студентите кои го блокираат Филозофскиот факултет во Нови Сад и им донесоа домашна храна, пијалоци и разни потребни работи.