Министрите за надворешни работи на ЕУ беа остро поделени околу војната во Газа на состанокот во Копенхаген во саботата, при што некои повикаа на силен економски притисок врз Израел, додека други јасно ставија до знаење дека не сакаат да одат толку далеку.

„Поделени сме по ова прашање“, изјави шефицата за надворешна политика на ЕУ, Каја Калас, пред состанокот. „Ако сме поделени по ова прашање, немаме глас на глобалната сцена, па тоа е многу проблематично“, додаде таа.

Таа, исто така, рече дека „не е многу оптимистична“ во врска со предлогот што го опиша како благ, бидејќи е помалку ригорозен од другите опции, за ограничување на пристапот на Израел до програмата на ЕУ за финансирање на научни истражувања.

Војната во Газа, започната како одговор на нападот на Хамас, ги откри длабоко вкоренетите разлики меѓу блокот од 27 земји-членки за Блискиот Исток како целина.

Многу земји-членки, како што се Ирска, Шпанија, Шведска и Холандија, се многу критични кон начинот на кој Израел ја води војната, првенствено поради големиот број цивилни жртви и ограничувањата за дистрибуција на хуманитарна помош. Тие бараат суспензија на трговскиот договор со Израел, но други земји, вклучувајќи ги Германија, Унгарија и Чешка, не прифаќаат силни економски или политички мерки.

Системот за интегрирана класификација на безбедноста на храната (IPC), кој работи со ОН и други групи, минатата недела соопшти дека во Газа има глад, но Израел побара од IPC да ја повлече својата проценка, отфрлајќи ги наодите како неточни и пристрасни.

Ирскиот премиер Сајмон Харис рече дека „децата во Газа гладуваат“ и се прашуваше „кога ЕУ како колектив ќе направи нешто, ако не сега“.

Германскиот министер за надворешни работи Јохан Вадефул рече дека Берлин јасно ставил до знаење дека Израел мора да биде внимателен и да ги почитува хуманитарните принципи во својата војна против Хамас и дека неговата земја ја суспендирала испораката на оружје што може да се користи во Газа.

Но, рече Вадефул, Германија „не е навистина убедена“ од предлогот за ограничување на пристапот на Израел до истражувачките фондови на ЕУ, прашувајќи се како суспендирањето на таквата цивилна соработка, што тој ја опиша како разумна, би било корисно.

Претставници на Европската комисија велат дека ја предложиле мерката за да испратат почетен сигнал до Израел и бидејќи не бара едногласност, поддршката од 15 земји би била доволна ако тие претставуваат 65 проценти од населението на ЕУ.