Украинскиот претседател Володимир Зеленски го оцени како „исклучително важно“ да се задржи поддршката на Полска во борбата против руската инвазија, неколку недели пред доаѓањето на власт на новиот националистички полски претседател, кој даде критички изјави за Киев.

„Полска ѝ обезбеди важна поддршка на Украина во областа на одбраната и во рамките на ЕУ и НАТО“, се заблагодари Зеленски на заедничката прес-конференција во Киев со полскиот претседател во заминување Анджеј Дуда.

„Исклучително е важно за нас да ја зачуваме природата на тие односи, да ја одржиме таа поддршка и почитувачки дијалог“, рече тој, уверувајќи дека Киев ќе направи „сè“ за да ги „зајакне“ односите меѓу Киев и Варшава.

Идниот полски претседател Карол Навроцки, кој победи на претседателските избори на почетокот на јуни, во својата кампања нагласи дека сака да ја намали помошта за украинските бегалци.

Трамп го поддржува

Полска прими повеќе од еден милион бегалци од Украина од почетокот на руската инвазија во февруари 2022 година, но со текот на времето, кај дел од општеството се појави антиукраинско расположение, кое стана поизразено во изборната кампања.

Карол Навроцки, кој е поддржан од американскиот претседател Доналд Трамп, исто така ги критикуваше плановите за пристапување на Украина во ЕУ и НАТО, како и лично претседателот Зеленски. Тој треба да ги преземе своите должности на 6 август.

Навроцки го предводеше Институтот за национално сеќавање во Полска и долго лобираше во Украина да одобри ексхумација на илјадници Полјаци убиени во масакрот во Волин помеѓу 1942 и 1944 година.

Дуда денеска во Киев изрази увереност дека Навроцки ќе „воспостави најдобри можни односи“ меѓу двете соседни земји, и покрај неговите критики кон Украина.

„Од канцеларијата на претседателот, светот изгледа малку поинаку отколку од позицијата на кандидат“, рече тој.