Специјалниот пратеник на американскиот претседател Доналд Трамп за Украина, Стив Виткоф, изјави дека украинскиот претседател Володимир Зеленски испратил писмо со извинување до Трамп по јавната расправија за време на состанокот во Овалната канцеларија на Белата куќа, јавија американските медиуми.

„Зеленски испрати писмо до претседателот. Тој се извини за инцидентот што се случи во Овалната соба“, изјави Виткоф за „Фокс њуз“ денес, додавајќи: „Мислам дека тоа беше важен чекор и имаше многу разговори меѓу нашите тимови, Украинци и Европејци, кои исто така се релевантни за оваа дискусија“.

Американските и украинските претставници треба да се сретнат утре во Саудиска Арабија за да ги обноват преговорите за договорот за експлоатација на украинските минерални суровини, што е најавено како чекор кон ставањето крај на војната со Русија. Виткоф рече дека го смета писмото со извинување до Трамп за „напредок“.

Во неговото заедничко обраќање до Конгресот, Трамп рече дека добил писмо од Зеленски во обид да ги подобри односите меѓу двете земји. Трамп изрази благодарност за писмото, кое пристигна само неколку дена откако САД целосно ја прекина воената помош за Украина.

На крајот на минатиот месец, за време на состанок во Овалната канцеларија, се случи досега невидена, жестока дискусија меѓу претседателот Трамп и потпретседателот Џеј Ди Венс и украинскиот лидер Зеленски. Состанокот, кој требаше да резултира со потпишување на договорот за минералните суровини, се претвори во непријатна конфронтација откако Зеленски го критикуваше пристапот на Трамп кон рускиот претседател Владимир Путин.

Трамп го предупреди Зеленски дека „се коцка со Трета светска војна“ и ја нагласи потребата Украина да биде поблагодарна за американската помош. Потпретседателот на САД Џ.Д. Венс, исто така, го критикуваше Зеленски поради тоа што не кажал „благодарам“ кон САД и Трамп. Зеленски потоа напиша на „Икс“ дека е благодарен за помошта од САД, но не се извинуваше кон Трамп или Венс.