Украинскиот претседател Володимир Зеленски во среда ги повика светските сили да соработуваат за да ја запрат војната на Русија во неговата земја, обвинувајќи го рускиот претседател Владимир Путин дека се обидува да ги прошири борбите надвор од Украина, пренесува Ројтерс.

Во говорот пред Генералното собрание на Обединетите нации, кое брои 193 члена, тој рече дека војната помогнала да се започне најдеструктивната трка во вооружување во историјата и дека Украина се стреми да го отвори извозот на своето оружје кон сојузниците.

„Фактите се едноставни, запирањето на оваа војна… е поевтино од изградбата на подземни градинки или масивни бункери за критична инфраструктура подоцна“, рече тој.

Тој посочи на наводните нарушувања на воздушниот простор од страна на руски беспилотни летала и борбени авиони во Полска и Естонија, членки на НАТО, како доказ дека Путин тестира нови граници во војната во Украина.

„Сега руските беспилотни летала веќе летаат низ Европа, а руските операции веќе се шират низ земјите“, рече тој. „Путин сака да ја продолжи оваа војна со тоа што ќе ја прошири, а никој не може да се чувствува безбедно во моментов.“

Зеленски рече дека Украина одлучила да почне да извезува оружје до сојузниците.

„Не треба да ја започнувате оваа трка од нула. Подготвени сме да споделиме што веќе се докажа. Подготвени сме нашето модерно оружје да стане ваша модерна безбедност. Решивме да го отвориме извозот на оружје. А ова се моќни системи тестирани во вистинска војна кога секоја меѓународна институција потфрли“, рече тој.