Украинскиот претседател Володимир Зеленски денеска изјави дека по завршувањето на војната со Русија, разговорите за безбедносните гаранции за неговата земја треба „итно“ да се подигнат на ниво на државни лидери. Како што пренесува Ројтерс, тој нагласил дека таквите договори мора да бидат ратификувани во парламентите на партнерските држави за да се обезбеди нивна трајност и доверливост.

„Основата на безбедносните гаранции за Украина мора да биде зајакнување на нашата армија, меѓународна соработка со партнерите и стабилно снабдување со оружје. Тоа е компензација за фактот што сè уште немаме полноправно членство во НАТО“, изјави Зеленски на прес-конференција во Киев.

Тој посочи дека Киев веќе доставил документ до Соединетите Американски Држави со конкретни потреби за оружје. Според него, Украина има три извори на вооружување: домашното производство, европските партнери и САД.

„Првата патека е домашно производство – беспилотни летала, технологии. Втората е европска – противвоздушна одбрана, артилерија. Третата е американска“, рече Зеленски.

Како втор клучен елемент, тој ги наведе јасните партнерски обврски кои би ја замениле отсутноста на Украина во НАТО.

„Отсекогаш сакавме да се приклучиме на НАТО, но тоа сè уште не ни е овозможено. Ако не НАТО, тогаш мора да знаеме на што конкретно се подготвени нашите партнери“, рече тој.

Зеленски нагласи дека прашањата за одбранбена поддршка, особено во случај на нова руска офанзива, не смеат да се решаваат само на ниво на воени претставници или советници за безбедност.

„Да претпоставиме дека Русија повторно ќе нè нападне. Кој од партнерите е подготвен и на што? Мора да имаме јасни одговори и гаранции дека нема да останеме сами“, изјави тој.

Украинскиот претседател подвлече и дека санкциите против Русија мора да бидат составен дел од системот на безбедносни гаранции, бидејќи прашањето на одвраќањето од агресија не се сведува само на воена сила. Тој повтори дека руските замрзнати средства во странство треба да бидат искористени за обнова на Украина – во енергетиката, комуникациите и инфраструктурата.

Како дополнителна компонента на долгорочните гаранции за стабилност, Зеленски го посочи и полноправното членство на Украина во Европската Унија, кое според него е од клучно значење за економската безбедност на земјата.