Од граѓанската иницијатива Зелен хуман град информираат дека го започнаа процесот на собирање 1.000 потписи за основање политичка партија и за таа цел ги повикаа граѓаните што сакаат да ги поддржат да се приклучат на процесот.

Зелен хуман град најави формирање на партија откако власта и опозицијата им забранија на независните да се кандидираат на избори

Од ЗХГ велат дека доколку ги обезбедат гласовите, тие ќе бидат првата партија формирана од волонтери, а не спонзори,  која ќе трча на изборите.

„Драги луѓе, Зелен хуман град ја формира првата партија во Македонија која во срцето на својата политичка агенда ги позиционира социјалната правда, заштитата на животните и животната средина. ЗХГ е воедно и првата партија во историјата на Македонија што ја основаат долгогодишни волонтери, а не спонзори. Ја основаат луѓе што со години во континуитет ги вложуваат своето знаење, време, енергија, како и финансии, за да создадат здраво и функционално општество за сите – и за луѓето и за животните.

Роковите се кратки, а принудени сме да формираме партија и да собереме потписи според строги законски правила за да имаме право да се кандидираме на избори и да продолжиме да се бориме. За воздух, за зеленило, за јавен интерес. За Скопје, какво што заслужуваме!“, се вели во соопштението.

Оттаму додаваат дека се единствената политичка група којашто има јавен и отворен процес за самокандидирање, МојКандидат, каде апликациите на сите кандидати се објавуваат јавно и за нив може секој да гласа.

„Веќе втора изборна година по ред ја отвараме вратата на секој што смета дека има доволно знаење и ентузијазам да ни се придружи на нашата листа за Совет на Град Скопје“, велат од организацијата.