На поранешниот претседавач на Советот на Општина Центар, Владимир Здравев, како и на уште еден осомничен во случајот со малверзации околу спомениците од проектот „Скопје 2014“ им е одреден притвор, објави „Телма“.

„На двајца осомничени, В.З. и Љ.Б., судија на претходна постапка им определи притвор. За трет осомничен, Т.Д., е определен куќен притвор. Најавено е дека уште тројца осомничени ќе бидат изведени пред судија на претходна постапка“, пишува „Телма“, повикувајќи се на извори од судот и од обвинителството.

Информацијата дека на поранешниот градоначалник на Центар, Владимир Тодоровиќ, кој е исто така осомничен во случајот, му е изречена мерка куќен притвор, која беше објавена на дел од медиумите, а првично ја пренесе и „Слободен печат“, засега не ја потврдуваат од Кривичниот суд, каде сѐ уште, повеќе од три часа, трае распитот на Тодоровиќ во врска со случајот.

Здравев е осомничен во предметот на Основното јавно обвинителство за гонење организиран криминал во предметот под кодно име „Феникс“, за злоупотреба на службена должност и овластување при изградба на спомениците од „Скопје 2014“. Обвинителот Љубомир Лапе на денешната прес конференција на Обвинителството информираше дека покрај Здравевм, во истрагата се осомничени уште 15 физички лица и 7 правни лица, а дека за седуммина осомничени побарале мерка притвор.

Според обвинителот, дел од осомничените се гонат и за перење пари, бидејќи преку офшор-компании пуштиле во промет пари стекнати од кривично дело, им го скриле потеклото и движењето. Лапе рече дека предметот е работен од поранешното Специјално јавно обвинителство и дека тој во него е вклучен од 2016 година. Тој додаде дека предметот се однесува само на 11 споменици кои се изградени во Општина Центар.

Обвинителот рече дека истрагата е почната вчера, кога доцна попладне бил уапсен поранешниот градоначалник на Општина Центар Владимир Тодоровиќ, кој е осомничен за злоупотреба на службената должност и овластување, бидејќи во периодот од 2007 до 2013 година овозможил незаконски да се префрлат средства од државниот буџет и од буџетот на Министерството за култура за изградба на спомениците преку Општина Центар, а кои се меморијални споменици и за нив е надлежно Собранието.

Лапе рече дека Тодоровиќ не е осомничен за перење пари, туку само за злопотреба на службената должност.

Покрај нив, осомничени се и поранешниот премиер Никола Груевски, кој е во бегство во Унгарија, поранешниот министер за финансии Зоран Ставревски, ексминистерката за култура Елизабета Канческа Милевска, како и поранешната градоначалничка на Центар, Виолета Аларова.

Тодоровиќ оди во куќен притвор, вели дека не се чувствува виновен