Здрав велигденски десерт: Колачиња од морков и ореви со глазура од крем сирење
Тортата од морков е популарен избор за велигденските празници. Станува збор за слатко задоволство со сочна подлога од морков и ореви, богато прелиена со глазура од крем сирење, пишува „Пун куфер“.
Препорачано
Состојките кои инаку би ги користеле за торта од морков можете да ги искористите и за подготовка на нешто поедноставно, но подеднакво вкусно.
Колачињата од морков и ореви се лесни за подготовка. Се печат за околу 15 минути, а кога целосно ќе се оладат, се премачкуваат со вкусна глазура од крем сирење, која потсетува на филот за чизајк.
Потребни состојки:
За колачињата:
- 300 г рендани моркови
- 300 г брашно
- 250 г омекнат путер
- 200 г кафеав шеќер
- 140 г сечкани печени ореви
- 100 г бел шеќер
- 2 големи јајца
- 2 мали лажички екстракт од ванила
- 1 мала лажичка цимет
- 1 мала лажичка прашок за печиво
- 1/2 мала лажичка сода бикарбона
- 1/2 мала лажичка мелен ѓумбир
- Прстофат сол
За глазурата:
- 400 г шеќер во прав
- 250 г омекнато крем сирење
- 125 мл омекнат путер
- 1 мала лажичка екстракт од ванила
Подготовка:
Колачиња: Во голем сад изматете го путерот со кафеавиот и белиот шеќер, околу три минути, додека не се добие мазна смеса. Додајте ги јајцата и екстрактот од ванила, па продолжете со матење.
Во друг сад измешајте ги брашното, прашокот за печиво, содата бикарбона, циметот, ѓумбирот и солта. Постепено додавајте ја смесата со брашно во претходната смеса и мешајте додека не се соединат. Рачно измешајте ги ренданите моркови и сечканите ореви.
Со две лажици формирајте колачиња и ставете ги на плех обложен со хартија за печење. Оставете растојание од околу 5 см меѓу нив бидејќи ќе се зголемат при печењето.
Печете во претходно загреана рерна на 180°C околу 14–16 минути, додека не бидат целосно испечени. Оставете ги да се оладат пред да ги премачкате со глазурата.
Глазура: Изматете го омекнатиот путер и крем сирењето додека не се соединат. Додајте шеќерот во прав и ванилата и матете додека не добиете мазна глазура. Премачкајте ја глазурата врз изладените колачиња и послужете ги со малку сечкани ореви по желба.
На здравје!
