Заврши обдукцијата за смртта на бебето на 21-годишната родилка од Битола, потврди за „Слободен печат“ директорката на болницата Елизабета Ивановска. Но, наодот не е напишан, па таа не сподели дали навистина бебето имало аномалии како што претходно изјави.

Државниот здравствен и санитарен инспекторат врши вонреден надзор за околностите под кои почина ова бебе. Станува збор за пациентка која што имала 21 година и ова ѝ била четврта бременост. Според родилката Сара Керимова, нејзината бременост била контролирана, односно на гинеколог одела и во Германија до петтиот месец од бременоста и во Македонија на приватен гинеколог. Царскиот рез ѝ бил закажан за неделата утрото, но бебето се родило починато според официјални изјави од болницата.

Керимова вчера за „Слободен печат“ изјави дека на прегледот кој му претходел на царскиот рез, имало срцева акција и бебето било живо.

Сара Керимова: Не знам што да мислам за смртта на моето бебе, зашто само еден час пред породувањето срцето му чукаше и јас го слушав