Поранешниот светски шампион во тешка категорија, Мајк Тајсон, го најави враќањето во рингот и тоа на 53. години во хуманитарни цели.

Тој веќе се врати на тренинзите и редовно објавува видеа од нив за да покаже дека се наоѓа во одлична форма, а тоа го потврдува и неговиот тренер Рафаел Кордеиро.

Боксерскиот промотер Еди Херн призна дека блиски луѓе до Тајсон му се обратиле за да го промовира неговото враќање во рингот.

– Добив телефонски повик, потоа и порака и ми кажа дека сака да зборува со мене за Мајк. Сакам да го видам Мајк повторно во рингот, но сметам дека е малку неодговорно да се пушти 53-годишна легенда во рингот. Ми изгледа дека се уште е опасен, но мислам дека луѓето се прашуваат дали навистина со 53 години може нешто сериозно да направи во рингот. Можеби би можел,а можеби не – вели Херн.

Мајк Тајсон го напушти рингот пред 15 години по поразот од Кевин Мекбрајд, а Херн се прашува колку е ризично да се промовира враќањето на боксерската легенда.

– Постои тенка линија која веќе неколку пати ја преминав, а се однесува за интегритетот на спортот против забавата и достигнувањето на одредени бројки. Нашата работа како промотери е да достигнеме одредени бројки за настаните кои се пренесуваат на телевизиите, но мораме да се држиме што поблиску до вистинската страна – потенцира Херн кој ја искоментира најавата за враќање на уште една боксерска легенда, Ивандер Холифилд кој има 57 години.

– Легендите гледаат како другите боксери заработуваат за ботбите за кои сметаат дека се безначајни. Тајсон не размислува за тоа дека сака да се врати и да го додаде на своето наследство. тој размислува за тоа колку пари можам да добијам. Одговорот е многу пари.