Наместо со 18 проценти, како досега, по новогодишните празници, занаетчиските услуги добија ДДВ од 5 проценти, што значи помалку пари за државната каса, а повеќе за давателите на услугите.

Олеснувањето важи за фризерите, чевларите, крпачите на облека и поправачите на велосипеди, но за муштериите цените останаа исти. Намалувањето на процентот на ДДВ, беше предлог на Занаетчиска комора-Скопје и тој се најде во четвртиот пакет мерки за економијата. Од еснафот не се задоволни со мерката за која велат дека е парцијална и веќе предизвикува незадоволство, поради селективноста.

-Сметаме дека многу малку занаетчиски услуги се опфатени со намалувањето на даночната стапка од 18 на 5 проценти, а решението се однесува на дејности кои не се воопшто ДДВ обврзници. Тоа се: поправка на велосипеди,  чевли и производи од кожа, облека и постелнина за домаќинството (вклучувајќи крпење и прекројување) и фризерски услуги. Законското решение, треба да се однесува за занаетчии регистрирани согласно Закон за занаетчиство, а не за претходно наведените бизниси, кои се регистрирани согласно ЗТД, како трговски претпријатија, ДОО или ДООЕЛ – вели за „Слободен печат“, Анета Атанасовска, извршен директор на Занаетчиска комора Скопје.

Доколку не се најде решение за намалување на процентот на оданочување и кај другите занаетчиски услуги, тогаш оваа законска измена ќе предизвика само незадоволство во еснафот, додава Атанасовска. Тие предлагаат во Законот за ДДВ да се додадат и други услужни дејности кај кои ќе се намали даночната стапка од 18 на 5 проценти,  затоа што најновото законско решение е практично неприменливо во пракса. Во однос на прашањето за намалување на цените на занаетчиските производи и услуги, за такво нешто нема услови, бидејќи секторот, од март 2020 година, едвај преживува поради намалениот обем на работа.