Војската на сириските владини сили зазеде клучен град на сириската опозиција на североистокот од земјата, и покрај заканите на турскиот претседател Реџеп Таип Ердоган дека ќе употреби сила доколку до крајот на месецот не се повлечат, соопшти денеска Сирискиот Центар за мониторинг на човековите права.

Оваа невладина организација, со седиште во Велика Британија, соопшти дека силите на сириската војска во вечерните часови влегле во градот Саракиб, по интензивниот судир со борците на сириската опозиција во текот на кој биле опколени неколку турски набљудувачки пунктови.

Саракиб е последниот поголем град што го држеа бунтовниците. Градот се наоѓа на крстосница на автопат што ги поврзува источна и западна Сирија.

Турција ги поддржува бунтовничките групи на севеозападот од Сирија, а има и десетина набљудувачки пунтови во провинцијата Идлиб, која се граничи со Турција.

Последните неколку дена официјална Анкара испрати нови војници и опрема, поставувајќи пунктови околу Саракиб, и на тој начин се обиде да го спречи упадот на владините сили.

Војската на сирискиот претседател Башар ал-Асад од декември напредуваше во Идлиб, последното упориште на бунтовниците во земјата.

Обединетите нации соопштија дека заради тоа се раселени повеќе од 500.000 лица.