По повеќе од една и пол година откако беше предложена, законската измена со која нападите врз новинари ќе се третираат исто како напад врз службени лица, денеска со тесно мнозинство беа усвоени во Собранието.

Тој што ќе нападне новинар или друг медиумски работник при извршување на службата, отсега ќе се казнува од три месеци до три години затвор.

Предлогот беше директно доставен од новинарските здруженија, за што и бурно реагираа за бавното минување на процедурите во собранието.

Гласањето на предлог-измените помина без подрршка од опозициските партии. Со измените, се воведува и ново кривично дело „екоцид“, а делот за борба против измама за финансиски интереси се изедначи со Директивата на Европската Унија.

На гласањето претходеше и амандманот на двајцата пратеници од Левица, Димитар Апасиев и Борислав Крмов кои побараа измени, за да не можат лесно да застаруваат делата за корупција. Предлогот, според Апасиев, се однесува и за кривичното гонење и за извршувањето на казната, за што добија поддршка од собраниското мнозинство, но не и од опозицијата со што измените заминаа на комисиска расправа.