Некои ја викаат „Мрзлива пита“, некои едноставно си ја викаат „Шарена проја“, а во суштина овие варијации се една иста пита – а тоа е шпанската пита.

Интересно е што во основа, шпанската пита е микс од медитерански комбинации на состојки. Во неа има и кисели краставички и пиперка, што значи дека ако имате дома од оваа туршија – питата е полн погодок за да ја подготвите овој период.

И навистина, се прави брзо, а и се јаде исто така брзо. Не е ни чудо што во тефтерчињата на мајка ми стои со тоа име, дека е мрзлива пита и е брз појадок или вечера кога немаш идеја што да зготвиш…

Еве што е потребно за оваа шпанска пита:

• 4 јајца
• 1 мала лажичка сол
• 200 мл масло
• 400 мл млеко
• 200 гр пченкарно брашно (не палента)
• 200 гр пченично брашно
• 1 прашок за печиво
• 200 гр кашкавал по ваш избор
• 200 гр шунка
• 100 грама сечкани кисели краставички
• 100 гр сечкани црвени кисели пиперки

Подготовка:

Во длабок сад изматете ги јајцата со маслото, млекото и солта. Настрана измешајте ги брашната со прашокот за печиво и додадете ги во течната смеса. Кашкавалот и шунката исечкајте ги на ситни коцки и додајте ги во смесата, а сосема на крај краставичките и пиперките. Добро промешајте ја смесата и истурете ја во намастен плех. Печете 20 – 25 минути на 200 степени, додека добро не зарумени.

Може да ја послужите со јогурт за појадок, или пак за вечера.

Уживајте!