Потпретседателот на српската влада, Александар Вулин, ги повика властите да ја зголемат безбедноста за претседателот Александар Вучиќ како резултат на светските безбедносни потреси предизвикани по обидот за атентат врз Доналд Трамп, јавуваат српските медиуми.

„Со медиумски притисок се обидуваат да ги натераат да се откажат од државната заштита и да бидат уште полесни мети“, рече Вулин, зборувајќи за Вучиќ и за неговото семејство.

Тој потсети дека во последните неколку месеци се случи и обидот за атентат врз словачкиот премиер Роберт Фицо, како и смртта на иранскиот претседател Ебрахим Раиси во авионска несреќа. Вулин смета дека не случајно се работи за луѓе кои се залагале „за поинаков свет и мир во Украина“, пренесува Нова.рс.

„Нека се подготви Вучиќ и секој што има храброст да се бори за слобода. Обидот за убиство на поранешниот претседател Трамп е израз на дозволена и поттикната омраза, истата омраза што се поттикнува и слободно се изразува кон Вучиќ и Србија“, предупреди тој.