Српскиот претседател Александар Вучиќ денеска предизвика лавина од негативни реакции откако ги посети македонските пациенти од Кочани, кои се лекуваат од тешки изгореници на Воено-медицинската академија во Белград, во придружба на дваесетина новинари, фоторепортери и сниматели.

Граѓани од Србија и од Македонија, но и од целиот регион, на социјалните мрежи не ги штедеа зборовите на осуда за овој потег на Вучиќ, оценувајќи го како бесчувствителност и политички маркетинг.

„Срам да ти е Вучиќ! Немаш тронка достоинство! Од каде имаш право да сликаш луѓе, болни во завои, заради самопромоција! Срам за тебе и за целата твоја придружба!“, „Повредените ги пративме да ги лекувате, а не да правите ПР“, „И ова го искористи за да се промовираш?!“, беа дел од коментарите на социјалните мрежи.

„За нас трагедијата во Кочани е како да се случила некаде во нашата земја. Верувам дека ќе можеме да им помогнеме на овие луѓе кои дојдоа со ужасно тешки повреди. На располагање им стоиме на нашите браќа и пријатели Македонци и подготвени сме да примиме повеќе пациенти бидејќи имаме болници од прва класа“, напиша Вучиќ на „Инстаграм“, додавајќи: „На македонскиот народ нема да му биде лесно, а ние секогаш ќе бидеме со него, како што тие беа со нас“.

Во меѓувреме, македонскиот премиер Христијан Мицкоски најави дека утре ќе оди во посета на повредените во скопската болница „8 Септември“.

„Претседателот на Владата на Република Северна Македонија Христијан Мицкоски ќе ги посети повредените во трагичниот пожар во Општина Кочани во ГОБ „8 Септември“, пишува во најавата испратена вечерва до медиумите.

Во катастрофалниот пожар во дискотеката „Пулс“ во Кочани во неделата рано наутро загинаа 59 млади луѓе, а 155 се повредени. Десетици од најтешко повредените се префрлени на лекување во странство, а 29 пациенти досега се испратени во Србија.