Израелскиот премиер Бенјамин Нетанјаху и американскиот претседател Доналд Трамп ќе одржат втор состанок вечерва во Вашингтон, пренесува Тајмс оф Израел, повикувајќи се на извор од кабинетот на Нетанјаху.

Двајцата лидери се сретнаа и синоќа на вечера, која според израелски претставници поминала во „многу позитивна и пријателска атмосфера“.

Посетата на Нетанјаху на Вашингтон вклучуваше и други средби – денеска тој разговараше со американскиот потпретседател Џ.Д. Венс, а претходно, во понеделникот, одржа двочасовни разговори со специјалниот претставник на САД за Блискиот Исток, Стив Виткоф, и со државниот секретар Марко Рубио.

На средбите, како што пренесуваат израелски извори, била разгледана ситуацијата во Газа, како и други прашања поврзани со билатералната соработка и регионалната безбедност.

Очекувањата се дека и на вечерашната средба Нетанјаху и Трамп ќе продолжат со разговорите за безбедносната соработка, поддршката за Израел и пошироките геополитички прашања во регионот на Блискиот Исток.