Македонската судиска двојка Димитар Митревски и Благојче Тодоровски ја добија и втората задача оваа сезона во најсилното европско ракометно клупско натпреварување, ЕХФ Лигата на шампионите.

На 8 октомври во Лисабон Митревски и Тодоровски ќе го судат мечот од четвртото коло во групата А помеѓу екипите на Спортинг (Португалија) и Нант (Франција).

Претходно нашите судии сезонава ја делеа правдата на натпреварот од првото коло од групата А помеѓу данскиот Алборг и унгарскиот Веспрем кој го добија домаќините со 32:28.

После три кола во оваа група Спортинг е на четвртото место со четири бодови, додека Нант е на петтата позиција со два.

Во рамките од групата Б македонскиот првак Еурофарм Пелистер во четвртото коло ќе гостува во Полска кај Висла Плоцк, а овој дуел ќе го судат Данците Мадс Хансен и Јеспер Мадсен.