Најдобрите ноќи поминати во барови или во клубови се сведуваат на случајни околности. Непознат бенд може да биде катастрофа или генијален. Ако го штиклираат второто поле и отидете повторно да ги видите, можеби ќе бидете во јадрото на растечката заедница на рани фанови. Пред сцената на едно мало место или во виорот на подиумот, разговорите може да доведат до нови пријателства.

Во двата случаи, има некаква релација со други човечки битија што често нè вади од себе и нè втура во искуства што не знаевме дека ќе ги имаме, а сепак сме благодарни дека ни се случиле. Тоа, пред сè, е убавината во автентичноста.

Во Скопје постојат многу мал број локали кои имаат неизвештачена автентичност. Најдобриот рецепт за оваа природност го поседува „Ла Кања“, малата временска капсула во епицентарот на Скопската чаршија, со епохална приказна која се случува благодарение само на чист инает.

Клубот „Ла Кања“ на 6 ноември го прославува својот 15-ти круг околу сонцето. Иако одамна е крунисана како култна појава, 15 години за локал во Скопје е навистина извонреден успех. Зборот појава наместо објект е посоодветен за „Ла Кања“ затоа што влијанието врз културата и ноќниот живот во овој случај не доаѓа од физичкото место.

Алтернативната култура во Скопје е константно во ветромет на промени, предизвици, а често и потиснувања. „Ла Кања“ и по четири промени на локација, пандемија, инфлација и безброј општествени промени во опсег на целата држава, има останато цврсто на нозе. Без разлика од тоа градбата каде била, е или ќе биде, има најлојална клиентела и најјасен став од кој било друг локал во Скопје.

Нешто што е симптоматично за нашата заедница е да се дискутира за старите добри времиња, вклучувајќи ги и поновите генерации кои ги немаат видено тие времиња со свои очи. Се гледа кон минатото со малку розеникави очила, но за едно нешто се согласуваат сите: има сè помалку и помалку веселба во Скопје. Поточно, нема веселба таму каде што нема автентичност. Во „Ла Кања“ во ниеден миг не фалела автентичност.

„Ла Кања“ е отскочен подиум за голем број од нашите големи културни играчи. Младиот секстет „Луфтанза“ својот прв концерт го имаат свирено во „Ла Кања“, во летото 2021 година. Тодор Караколев, „Мугер Фугер“, „The Local Blue“, „Undone“, „Мариналеда“ и стотици други се од локалната сцена што поминале низ вратите на „Ла Кања“.

„Гола планина колектив“, „Шарла рекордс“ и „ПМГ Рекордингс“ се големи колективи чии музичари имаат промовирано, свирено или пуштано музика на познатата калдрма. Само оваа година, гости од странство, како „Putan Club“ од Франција, „The Homesick“ од Холандија и „malpremal“ од Словенија, ја имаат наполнето платформата каде што се полни целата улица со гости кои дошле да слушаат музика.

Во нашиот град некогаш е тешко да се одржи континуитет во негата на културната сцена. Но во овој случај, калето што е останато од љубители на независната уметност и на слободната дружба во голем дел го држи „Ла Кања“. И тоа кале е љубезно негувано и строго заштитено од својот газда Деан (Змејкоски).

Со најголема солидарност и почит, оваа приказна е најдобриот пример од нашата средина за тоа како се работи со вистинска, чиста љубов кон културата, а и со непопустлива упорност и труд. Сите прекрасни луѓе што го сакаат ова место како свој дом овие 15 години се доказ дека најмногу се цени тоа што е искрено и свое.

Авторка на текстот: Марија Јаќовска

(Текстот е објавен во „Културен печат“ број 254, во печатеното издание на весникот „Слободен печат“ на 2-3.11.2024)