Вработените во ЈП „Улици и патишта“ – Скопје најавуваат штрајк пред Град Скопје. Во соопштението испратено до медиумите, тие велат дека претпријатието повторно има сериозни проблеми со исплата на плата за вработените.

– Поради лошото менаџирање на двоецот Арсовска – Глигоров преку разрешениот директор Ванчо Умленски, претпријатието повторно како и минатиот месец има сериозни проблеми со исплата на личниот доход на вработените – се вели во соопштението.

Вработените велат дека причините за ваквата состојба се:

Презадолжување на претпријатието кон добавувачи на материјали во износ од 240 милиони денари;
Неплаќање на долгот од страна на директорот, односно градоначалничката, т.е. селективно плаќање на фирми блиски до секретарот и градоначалничката;
Сметката е блокирана во износ од 10 милиони денари и извршни решенија во износ од 40 милиони денари кои ќе стапат на сила наредниов период;
Во претпријатието нема основни средства за работа како нафта, ризла, тампон, рабници. Причина за ова е неплаќањето на обврските кон добавувачите, а со тоа и испораката на материјалите;
Градежни машини и возила што поради погоре наведените причини се со дефекти и не се сервисираат со месеци;

-Вработените се принудени преку штрајк да го остварат своето право на личен доход и истиот ќе биде пред Собранието на Град Скопје кога вработените ќе дојдат со целата механизација – порачаа вработените во претпријатието и велат дека дополнително ќе објават информации за штрајкот.