Според најновиот извештај од индикативни мерења на квалитетот на воздухот на Министерството за животна средина и просторно планирање, просечните концентрации на ПМ честички во Трубарево се во рамките на дозволените граници.

Мерењата биле направени од суспендирани ПМ честички земени од зоната на Трубарево, а биле спроведени во рок од 24 часа, односно од вчера од 11:00 часот до денеска во истото време.

-Концентрациите се движат во рамките на 24-часовната гранична вредност за заштита на здравјето на луѓето, согласно Уредбата за гранични вредности за загадувачки супстанции во амбиентниот воздух („Службен весник на РМ“, бр. 183/17), велат од Министерството и додаваат дека ќе продолжат со редовно следење на квалитетот на воздухот и навремено информирање на јавноста.

Според резултати од последните мерења просечната концентрација на честичките изнесувала 9.8 микрограми на кубен метар, максималната измерена вредност изнесувала 43.3 микрограми на кубен метар, а моменталната на крајот од периодот – 8.2 микрограми на кубен метар, велат од министерството.