Скопска Апелација му ја зголеми казната на четири години затвор на возачот Јордан Ѓоргиев за сообраќајката со смртни последици кај „Сити Мол“, во која загина 24-годишната Викторија Николова.

Ѓоргиев претходно од Кривичниот суд е осуден на тригодишна казна затвор за сообраќајната несреќа во која освен што загина Викторија, беше повредено и нејзиното момче Леонид Даов, пресуда која надлежниот јавен обвинител од Основното јавно обвинителство Скопје, ја обжали незадоволен од висината на изречената санкција во која се засметуваше и времето поминато во притвор.

Обвинетиот на судењето во април ја призна вината и судскиот процес против него заврши со едно рочиште. Ѓоргиев возел со брзина поголема од пропишаната, не се придружувал на сообраќајните прописи и не ги пропуштил пешаците на обележаниот прешачки премин на булеварот „Партизански одреди“ кобната вечер на 20 јануари годинава.

Семејството на трагично загинатата Викторија во неколку наврати организираше протести за подигнување на свеста кај возачите да ги почитуваат сообраќајните правила и прописи и до надлежниот суд да изрече казна сразмерна на стореното дело па своето незадоволство го изрази и во април откако на Ѓоргиев му беше изречена тригодишната затворска казна.