Во Шведска, товарен воз што превезувал муниција денес излета од шините поради обилните дождови што го погодија северниот дел од покраината Вестернорланд, а неколку вагони завршија покрај шините.

„Еден од вагоните содржи муниција и литиумски батерии“, изјави портпаролот на Шведските железници, Петер Јонсон, според шведскиот јавен сервис СВТ.

Опасниот товар ќе го преземат спасувачките служби, а потоа, Шведските железници ќе го исчистат и ќе ја проценат штетата на терен.

Според соопштението од Шведските железници „Трафикверкет“, реконструкцијата на железничката линија ќе трае неколку недели.

„Се чини дека одложувањата ќе бидат подолги, но не можеме да го прецизираме точното време“, заклучи Јонсон, пренесува Танјуг.