Регулаторната комисија за енергетика не се откажува од дополнителен час, а можеби и два часа, евтина струја преку ден, но сега анализите покажале дека нема услови за тоа и дека тоа би предизвикало дополнителни финансиски проблеми во ЕСМ. Ова го обелодени претседателот на Регулаторната комисија за енергетика Марко Бислимоски, кој уверува дека поголемо времетраење на евтината тарифа ќе има штом за тоа ќе се создадат услови, но објасни дека сигурно тоа нема да биде до крајот на годината. Причината ја лоцираше во високите цени на струјата на унгарската берза што се случи неочекувано и што ги наруши пресметките.

– Кога разговаравме за воведување евтина тарифа, кажавме дека она што се случува на пазарот, тоа ќе сакаме и да го пресликаме. За жал, на пазарот од 20 до 24 часот цените се убедливо повисоки од сите други периоди во кои имаме и евтина и скапа тарифа. Доколку би го следеле пазарот, тогаш воведувањето евтина тарифа би било од 12 до 16 часот, но ќе треба да ја укинеме евтината тарифа што ја имаме од 22 до 24 часот, кога имаме реално високи цени. Тоа е удар што ни се случи поради цените во регионот. Ќе ги следиме случувањата. Сметаме дека со укинување на евтината струја навечер, повеќе би предизвикале револт кај граѓаните, па затоа сега ќе остане како што е, а дополнителен час или два во текот на денот ќе се воведе штом за тоа се создадат услови – изјави Бислимоски, кој вчера како претседател на Регулаторната комисија беше домаќин на Експертската мисија ТАИЕКС, на која се разговара за пакетот на чиста енергија и на пакетот за интеграција на пазарите на електрична енергија.

На новинарско прашање, зошто на пазарот на Југоисточна Европа се случиле вакви високи цени, повисоки од оние во Западна Европа, Бислимоски вели дека добиле објаснување од Енергетската комисија.

– Според објаснувањето, имало високи температури, па поради тоа била затворена нуклеарната електрана во Романија. Потоа, имаше објаснување и во однос на интерконекциите помеѓу земјите во регионот. Но, сметам дека влијанието во Македонија и во регионот не е произлезено од овој регион, туку ние на некој начин сме спотер поради случувања во друг регион – рече Бислимоски.

Тој изрази и сомнеж во однос на одговорот што го добил од Европската енергетска заедница во однос на високите цени.

– Сите регулаторни тела од регионот треба да направат сериозна анализа, ако треба да се инвестира во прекугранични капацитети – да се инвестира. Но, тие исти капацитети беа и во јануари и во февруари и во март, а сега се доведовме како регион да плаќаме цена во некои денови трипати повисока! – вели Бислимоски.

Според Бислимоски, за да не ни се случуваат вакви работи, треба да имаме своја регионална берза.

– Јас мислам дека еден од проблемите е што во нашиот регион сите берзи се реферираат според цената на берзата во Унгарија, каде што покрај играчи од регионот, тргуваат и играчи од Средна Европа и од Австрија и сметам дека ние како регион треба да направиме сериозна берза, која ќе ги отсликува нашите состојби. Ама на Балканот кога ќе се почне да се разговара за заеднички проект, прво прашање е каде ќе биде сместена таа берза и во старт работите се одложуваат. Но, верувам дека по искуствата од летово, подобро е да направиме заедничка берза што ќе ги намали и трошоците за работењето, за разлика од трошоците на поединечните берзи – објасни Бислимоски.

Претседателот на РКЕ потсети и дека Бугарија, Грција и Романија, како земји членки на ЕУ, го издигнале тоа прашање на многу повисоко ниво и одржуваат состаноци на повисоко ниво и бараат одредени финансиски надоместоци.