Препознатливиот вокал на групата „Љубојна“, м-р Вера Милошевска-Јосифовска, која е професор по традиционално пеење и музиколог, на 28 декември, во „Филхармонија Кафе Бар“, од 19:30 часот, ќе ја промовира својата прва книга „Македонскиот вокален мелос во современиот контекст – Оживување на една заборавена музика“ во издание на „Флип бук букс“ (Flip Book Books).

Книгата е повеќеслојна и е плод на долгогодишно истражување во областа на музиката, пред сè, на македонскиот вокален мелос, односно македонската пејачка традиција, и зборува за нејзината суштина, значење и применливост во различни контексти на денешницата.

Интересна е апликативната улога на авторката, бидејќи истовремено таа се обраќа како етнолог, антрополог и музиколог, но и како пејач кој своите истражувања преку сцената ги втиснува длабоко во срцата на публиката.

Книгата изобилува со интересни гледишта во однос на нејзината поврзаност со културните појави некогаш и денес, и при тоа дава коментар на тоа дека музиката е неприкосновен идентитетски маркер.

Дел од книгата зборува и за музичкиот бран којшто го разбуди „Љубојна“ и нејзината улога во оживувањето на оваа, своевремено маргинализирана, музика, станувајќи моќно јадро кое ја анимира јавноста.

На промоцијата заедно со актуелни музичари и млади пејачки грла од класата на м-р Милошевска-Јосифовска, со музичка сесија во живо и изведба на различни вокални стилови од пејачката традиција на Македонија, ќе биде презентирано сè што не сте знаеле (а ве интересира) за нашиот безвременски македонски мелос и ќе продолжи во предновогодишна концертна забава со „Љубојна“.

Промотор на настанот е проф. д-р Илина Јакимовска, а свој осврт ќе даде и проф. д-р Велика Стојкова Серафимовска.