Јубилејното дваесетто издание на Интернационалниот фестивал на античка драма „Стоби“, под мотото „Нови манифести“ ќе се одржи во периодот од 2 до 12 октомври во Велес.

Фестивалот обединува вкупно девет претстави во официјалната и придружната програма, и тоа на театарски куќи од Србија, Турција, Бугарија, Казахстан и Грција и, секако, македонски театарски продукции чиј интерес е античката драма и нејзините современи наративи.

За време на фестивалот ќе бидат поставени три изложби на фотографии и мултимедија, ќе се реализираат четири работилници, ќе се промовира третото издание на традиционалната фестивалска публикација, ќе се одржи панел, ќе има посебен актив за најмладата публика, а за секоја од претставите во официјалната селекција ќе се одржува тркалезна маса. На богатиот репертоар на фестивалот ќе се најдат речиси триесет разновидни настани во десет фестивалски денови.

Фестивалот ќе биде отворен на 2 октомври со претставата „Антигона“ од Жан Ануј и идеи и фрагменти од Софокле, Рој Хен и Александар Морфов во режија на Александар Морфов и продукција на Драмскиот театар „Иван Радоев“ од Плевен, Бугарија. Претставата се изведува на големата сцена на велешкиот театар „Петре Прличко“, со почеток од 20 часот.

На 3 октомври на програмата се три настани. Во 19.30 часот ќе биде отворена изложба на фотографии потпишани од Ѓорѓи Митревски со наслов „Химна сред урнатини“. Со почеток од 20 часот, на малата сцена во велешкиот театар ќе биде изведена претставата „Светулка“, по текст на Џоан Јаго, според грчките митови за преобразбите и во режија на МаркЛ евитас, во изведба на „Галата Перформ“ од Истанбул, Турција. Истата вечер, на големата сцена, со почеток од 21.30 часот ќе биде изведен авторскиот проект „Одење и други кореографски решенија“ на Филип Петковски, копродукција со Националната опера и балет.

На големата сцена на велешкиот театар на 4 октомври, во 20 часот, ќе биде изведена претставата „Седмиот ден“, по библиски мотивии според истоимениот роман на Горан Врачар, во режија и адаптација на Александар Лазиќ и копродукција меѓу Народен театар Белград и продукцијата „Патувачки актер“. Пред изведбата на претставата ќе биде отворена изложбата „Драма, опера, балет“, фотографии од костимографии на Благој Мицевски.

На 5 октомври, во 20 часот, на сцената на Народен театар – Битола ќе биде изведена претставата „My name is Medeјa“ по авторски текст на Милан Рамшак Марковиќ според Еврипид, во режија на Себастијан Хорват. Превозот до Битола и билетите за претставата се организирани од страна на фестивалот.

Во петок, 6 октомври, во 19.30 часот, ќе се промовира изложбата „Мемоар“ на Данчо Стефков, а на малата сцена на велешкиот театар, со почеток од 20 часот, гостите од Казахстан, Градскиот куклен театар за деца и младинци – Шимкент, ќе ја изведат претставата „Антигона“ според Жан Ануј, во режија на Куандик Касимов.

Саботата на 7 октомври е резервирана за најмладата публика и ќе биде изведен бродвејскиот мјузикл „Малата сирена“, со почеток од 12 часот. Истиот ден, од 17 часот, за најмладите ќе се одржи работилница насловена „Игра во/со митови“ со Билјана Крајчевска, чиј, пак, авторски текст создаден заедно со актерите „Жени во собрание“, според Аристофан во режија на Ќендрим Ријани, во понеделник, на 9 октомври, ќе се изведе на сцената на Театар Комедија во Скопје, со почеток од 20 часот. За велешката публика, превозот до Скопје и билетите за претставата се организирани од страна на фестивалот, со претходна резервација.

Последната претстава во рамките на фестивалот е „Бахки: Агава“, авторски текст на Тамара Барачков според Еврипид во режија на Нина Николиќ. Оваа претстава – копродукција меѓу Македонскиот народен театар,Градски театар од Јанина, Грција, и „Перипетија продукција“ – Скопје, ќе биде изведена на големата сцена на велешкиот театар на 10 октомври, со почеток во 20 часот. Пред изведбата на претставата ќе биде промовирана фестивалската прубликација „Нова античка драма III“ во издание на „Полица“.

Фестивалот ќе биде затворен на 12 октомври со доделување на меѓународните награди, а во чест на лауреатите Операта при Националната опера и балет ќе одржи гала-концерт. На пладне, пред затворањето на фестивалот, на малата сцена ќе се одржи панел на тема „Антигона, триесет години потоа“, а панелисти ќе бидат пионерите од велешкиот театар и нивните соработници кои отпочнаа со продукција на претстави во Античкиот театар во Стоби, активност која денес се нарекува ИФАД „Стоби“.

На 5 октомври, во велешкиот театар, членовите на жирито од својот професионален аспект ќе одржат по една работилница, и тоа: драматургот Катерина Момева на тема „Античка драматургија – современи прочити“, актерот Јордан Витанов на тема „Предизвикот меѓу актерот и античкиот стих“ и на 10 октомври режисерот Љупчо Ѓоргиевски – Бубе ќе ја одржи работилницата „Старогрчката трагедија – режисерска провокација“.

Дваесеттото издание на ИФАД „Стоби“ го овозможија Министерството за култура и Општина Велес. Фестивалот традиционално доделува четири меѓународни награди: Награда за најдобра женска улога, Награда за најдобра машка улога, Награда за најдобра режија и Гран-при на фестивалот.