Украдени се новонасадени садници на улицата „Димитар Влахов” во Велес каде се уредува нова зелена површина и искршени се садници во Младинскиот парк, информираат од ЈКП Дервен”.

Тие реагираат дека и покрај нивните напори да се разубави градот со обновување на урбаната опрема, цветните жардињери и дрвјата на јавните зелени површини, несовесни граѓани ги уништуваат поставените клупи, летниковци и корпите за отпадоци, а свежо засадените цвеќиња и дрвја ги снемува преку ноќ.

–Ова е појава со која се соочуваме со години наназад. Вандализмот на јавните зелени површини и градските паркови веќе станува редовна пракса, како и крадењето на новонасадените дрвца и цвеќе, револтирано реагираат од ЈКП „Дервен”.

Воедно, посочуваат дека за вработените од ЈКП „Дервен” уништување на младите дрвца и цветни насади или нивно крадење од несовесни граѓани за нив значи неколкукратно повторување на активностите, а на претпријатието и градот им нанесува големи финансиски загуби.

–Факт е дека материјалите со кои ЈКП „Дервен” и Општина Велес располагаат не се бесконечни и службите не се во можност до недоглед да ги пополнуваат со цвеќе местата од каде тоа редовно се краде и да го обновуваат секојдневно сето тоа што некој го уништил.Затоа доколку сакаме да живееме во убаво уреден град мора да покажеме поголемо внимание кон зеленилото и урбаната опрема и да ги чуваме наместо да ги уништуваме, потенцираат од ЈКП„Дервен”.

Тие апелираат до граѓаните да покажат повеќе свест и грижа за зеленилото и урбаната опрема, со што ќе придонесат градот во кој живеат да биде поубав.