Илјадници луѓе почнаа да се собираат во Вашингтон за поддршка на Израел, во војната против палестинското движење Хамас, која започна на 7 октомври. Собирот го организираат еврејски организации. Предвидена е прошетка од Капитол Хил до споменикот на Линколн.

Американските медиуми објавија дека очекуваат пристигнување на неколку десетици илјади луѓе. Собирот го обезбедуваат припадници на безбедносните сили, некои улици се затворени, додека граѓаните треба да поминат проверки на бариерите и влезовите на собирот.

Насобраните бараат ослободување на околу 240 заложници кои ги држеше Хамас од 7 октомври. Некои граѓани носат плакати на кои пишува „Уништете го Хамас“ и „Вратете ги (заложниците)“.

На собирот видео обраќање ќе има израелскиот претседател Исак Херцог. Се очекува да зборуваат и семејствата на заложниците, како и некои претставници на Конгресот.

Најмалку 1.200 луѓе се убиени во Израел од почетокот на конфликтот, од кои повеќето цивили, а повеќе од 240 луѓе се земени како заложници. Како одговор, Израел започна напади и копнена операција во Газа.

Според Хамас, повеќе од 11.000 Палестинци биле убиени во Газа.