Новиот сопственик на Твитер, милијардерот Илон Маск, ги отпушти сите членови на Управниот одбор (УО) и стана единствен директор, соопшти компанијата. Според најавите, Мас, кој ја купи социјалната мрежа за 44 милијарди долари откако со месеци се двоумеше околу купувањето, сега со својот адвокатски тим планира бран на отпуштања кој според најавите ќе зафати 25 отсто од вработените.

Еден од соработниците на Маск објави анкета во која прашува колку корисниците би биле спремни да платат за „синиот знак“, кој претходно Твитер го користеше за да ја потврди верификацијата на профилот за другите корисници да знаат дека не е лажен.

Маск на ова одговори со: „Интересно“.

Критичарите се потсмеваа на знакот, која често се доделува на познати личности, политичари, бизнис лидери и новинари, како симбол на статусот на елитата.

„Процесот на верификација моментално е во тек“, напиша Маск во неделата на Твитер како одговор на корисникот кој побарал помош да се потврди.

Маск во понеделникот ги демантира пишувањата дека се подготвува да отпушта вработени.

Во меѓувреме, во петокот, саудискиот милијардер принцот Алвалид бин Талал рече дека тој и неговата компанија „Кралд холдинг“ купиле акции на Твитер за 1,89 милијарди долари, што ги прави најголеми акционери по Маск.

Веста предизвика загриженост кај некои пратеници, меѓу кои и сенаторот Крис Марфи.

„Треба да бидеме загрижени што Саудијците, кои имаат јасен интерес да го потиснат политичкиот говор и да влијаат на американската политика, сега се вториот најголем сопственик на голема платформа за социјални медиуми“, напиша Марфи на Твитер, додавајќи дека националната безбедност е загрозена.

Откако ја презеде сопственоста на Твитер, Маск повика група пријатели и инвеститори од технолошкиот свет да помогнат во трансформирањето на компанијата со седиште во Сан Франциско, која најверојатно ќе вклучи и промена на нејзиниот персонал.