На сцената на Театар за деца и младинци – Скопје, на 11 јули, во 20 часот, ќе се случи премиерната изведба на претставата „Куќата на духовите“, за првпат кај нас, хорор-комедија за деца, наменета за 8+ возраст, чии автори се Деан Дамјановски и Горјан Милошевски. Режисер на претставата е Деан Дамјановски. Горјан Милошевски е коавтор и драматург на истата.

– Две деца, едното плашливо, а другото голем инает, го бараат нивниот исчезнат татко во „Куќата на духовите“. Таа куќа, замислете ја како еден возбудлив дел од голем забавен парк. Во неа ве очекуваат непредвидливи случки и смешни стапици. Заедно со Јаков и Веда, сите одиме на пат во кој тие совладуваат неверојатни пречки. Низ тој пат следиме уникатна и многу забавна битка меѓу доброто и злото. Што, всушност, крие куќата? Каква тајна? Какво проклетство? Дали постои клуч, некаков спас и решение? – загатнува Горјан Милошевски, еден од авторите и драматург на претставата.

Претставата изобилува со уникатни костими на костимографката Елена Вангеловска и одлична сценографија на Филип Коруновски. Музиката е на Горан Трифуновски – Пајак.

За посветената актерската изведба се погрижи екипата која е составена од Ангела Димитрова, Петар Стојанов, Мики Анчевски, Винета Дамческа Мојаноска, Никола Наковски, Емра Куртишова Стојанова, Симона Спировска и Марија Ѓорѓијовска, известија од НУ Театар за деца и младинци – Скопје.