Камерниот состав „Пијано трио“, во годината кога го слави својот десетгодишен јубилеј, има изразена концертна активност. Прво настапи во Виница и во Битола, а потоа следуваше концертот на отворањето на фестивалот „Златна лира“.

Следниве денови триото ќе има настап во Србија и во Хрватска. На покана од Музичкиот центар во Крагуевац, Србија, на 12 ноември триото ќе одржи концерт со дела од македонски и светски композитори во свечената сала на „Прва крагуевска гимназија“.

Веднаш потоа, на 16 ноември, триото ќе одржи концерт во македонскиот КИЦ во Загреб, Хрватска. Во чест на наградата „Георги Божиков“ во Загреб ќе бидат изведени дела од македонски композитори.

Триото е составено од тројца етаблирани музичари: Татијана Петрушевска Караскаковска, прва обоа во оркестарот на НОБ; Марјан Милошевски, прв фагот во оркестарот на НОБ и професор по фагот на ФМУ; и Петар Макариевски, пијанист и уметнички соработник при ФДУ. Tриото ги здружи своите сили во 2014 година.

Она што го карактеризира „Пијано трио“ како состав се истенчен и моќен звук, интерактивност, прецизност во изведбата, индивидуалност и виртуозност на музичарите. Во 2024 година триото ја доби наградата „Георги Божиков“, која ја доделува СОКОМ за низата успешни концерти во земјата и во странство со дела од македонски композитори.

(Текстот е објавен во „Културен печат“ број 255, во печатеното издание на весникот „Слободен печат“ на 9-10.11.2024)