Сирискиот лидер Ахмед Шара повикува на мир откако во подрачја на Сирија, во текот на изминатите денови се случија најлошите насилства после падот на Башар Ал Асад и убиени се над илјада луѓе, главно цивили.

Мораме да го сочуваме националното единство и мир, можеме да живееме заедно, рече привремениот претседател Шара, во виде кое го пренесуваат арапските медиуми и саудиската телевизија Ал Арабија.

Вооружени групи пукаа кон безбедносните сили и поставуваа заседи од автомобили на патиштата што водат во поголемите градови. Најмалку 200 припадници на безбедносните сили загинале во овие пресметки.

Сириската невладина Опсерваторија за човекови права вчера соопшти дека само од четвртокот во Сирија се убиени 300 цивили во судирите меѓу сириските безбедносни сили и сојузничките групи со лојалистите на соборениот претседател Башар ал Асад во западниот дел на земјата.

Ова е прво насилство од ваков размер откако бунтовничката коалиција предводена од радикалната исламистичка сунитска група Хајат Тахрир ал-Шам (ХТС) ја презеде власта во Сирија на 8 декември.

Судирите избувнаа во четвртокот по неколкудневните тензии во регионот Латакија, упориште на алавитското малцинство, огранок на шиитскиот ислам на кој му припаѓа семејството на Асад.