Босанската полиција вчераутро во зградата на сараевската кула уапсила две лица кои со потерница биле барани од страна на Србија.

Како што неофицијално дознават српските медиуми, станува збор за двајца мажи кои се поврзани со кланот на Вељко Беливук, но и со криминалната група „вештерки“.

– Уапсени се Дарко Дуловиќ и Душан Јовановиќ, познат како Гиба. Дуловиќ и е познат на јавноста откако беше уапсен за убиството на Синиша Милиќ во Белград во 2018 година, додека Јовановиќ беше поврзан со ликвидација на „шкаљараци“ на Крф во 2020 година – вели извор за српски Курир.

Како што објави синоќа босанскиот портал Аваз, осомничените изнајмиле неколку станови на самиот врв на таа зграда. Инаку, Сараевските кули се сметаат за еден од најлуксузните комплекси во главниот град на Босна и Херцеговина.

Во акцијата за апсење учествувале голем број припадници на Специјалната единица на босанското МВР. Од Министерството за внатрешни работи на кантонот Сараево засега не соопштуваат ништо, но претресите траеле цел ден.

Да потсетиме, на 13 септември во Босна и Херцеговина беше уапсен маж по потерница на Србија. Како што објавија тогаш медиумите, наводно се работи за Александар Бугарски (28) од Белград, кој исто така е поврзан со групата на Беливук.