На вработените во пабовите ширум Англија ќе им биде забрането да користат популарни фрази, со кои поттикнуваат луѓето да пијат повеќе алкохол. Фразите како „повторно истото?“ („same again?“) и „дали е тоа двојно?“ („is that a double?“) ќе бидат забранети, во обид да се намали прекумерното пиење, пишува „Сан“.

Насоките се дел од водичите за обука за сите луѓе кои работат во барови, пабови и ресторани. Онлајн курсевите – кои се бесплатни за целиот персонал – имаат за цел да ги спречат работниците да користат фрази, што ги тера луѓето да пијат повеќе.

Исто така, ги охрабруваат работниците да избегнуваат омаловажување на луѓето, кои се одлучуваат за евтини или безалкохолни пијалоци.

На вработените кои го користат упатството им се кажува: „Избегнувајте употреба на јазик, кој може да ги натера клиентите да се чувствуваат под притисок повеќе да пијат. На пример, не им кажувајте: Повторно истото?Наместо тоа кажете: Што би сакале овој пат?“

Меѓународната алијанса за одговорно пиење (IARD), која го предложува новиот начин на комуникација на вработените со гостите во угостителските објекти низ Англија, е непрофитна организација посветена на намалување на штетното пиење.

„Компаниите членки на Меѓународната алијанса за одговорно пиење (IARD) ги поддржуваат напорите на трговците и угостителските места, нивниот персонал одговорно да продава и служи алкохолни пијалоци, за да помогне да се спречи продажбата и услугата кај малолетните лица или оние свесно затруени. Во насока на ова, ние сме горди што ги лансиравме нашите најнови ресурси, кои можат да се искористат за да му се даде доверба на персоналот да одбие продажба и сервис каде што е потребно“, вели Хенри Ешворт, претседател и главен извршен директор на организацијата.

Организацијата е поддржана од големите производители на алкохол, вклучувајќи ги „Хајнекен“ („Heineken“), „Диажио“ („Diageo“), „Бим Сантори“ („Beam Suntory“) и други.