Анализирано на годишно ниво, вкупните депозити се зголемени за 8,0 отсто, како резултат на повисоките депозити на двата сектора, со поизразен придонес на секторот домаќинства. Годишниот пораст на кредитите, пак, е 5,3 проценти и произлегува од зголемувањето на кредитите на двата сектора, со поголем придонес на секторот домаќинства, соопшти Народната банка.

Паричната маса во октомври забележа месечен пад од 0,7 отсто, во поголем дел како резултат на намалените депозитни пари и краткорочните депозити, при помал придонес кон падот и на готовите пари во оптек, a во услови на раст на долгорочните депозити до две години. На годишна основа, паричната маса е зголемена за 5,2%, главно поради растот на депозитните пари и краткорочните депозити, при позитивно влијание и на останатите компоненти.

Во октомври, вкупните депозити се намалени за 0,3 проценти на месечна основа, во целост како резултат на падот на депозитите на корпоративниот сектор, додека депозитите на домаќинствата остварија раст. Споредено на годишно ниво, вкупните депозити бележат раст од 8,0 отсто, којшто се должи на повисоките депозити на двата сектора, со поизразен придонес на секторот „домаќинства“.

Кај вкупните кредити во октомври е забележан месечен и годишен раст од 0,3 и 5,3 проценти, соодветно, кој произлегува од зголемувањето на кредитите на двата сектора, со поголем придонес на секторот „домаќинства“.

Во октомври, вкупните депозити на корпоративниот сектор остварија месечен пад од 1,8 отсто. Надолната промена пред сè е резултат на пониските депозитни пари, при пад на краткорочните депозити во странска валута и на вкупните долгорочни депозити, во услови на раст на краткорочните депозити во денари. На годишна основа е забележан раст од 14,1 проценти, во поголем дел поради повисоките краткорочни депозити во странска валута, при остварен дополнителен раст и кај депозитните пари и долгорочните и краткорочните депозити во денари.

Кредитите на корпоративниот сектор, овој месец, бележат минимален месечен раст од 0,1 отсто, при годишен раст од 4,1 проценти. Притоа, месечната и годишната промена во целост се должат на зголеменото кредитирање во денари, при остварен пад на кредитите во странска валута.

Во октомври, вкупните депозити на домаќинствата се зголемени за 0,3 отсто на месечно ниво, во целост како резултат на растот на долгорочните депозити во странска валута и во денари, во услови на забележан пад кај останатите компоненти.

Годишниот раст изнесува 6,8 проценти и се должи на повисоките долгорочни депозити и депозитните пари, а во помала мера и на краткорочните депозити во денари, додека краткорочните депозити во странска валута бележат пад.

Кај кредитите на домаќинствата, овој месец, е забележан месечен раст од 0,5 отсто, како резултат на повисокото кредитирање во денари и во странска валута, поизразено кај кредитите одобрени во денари. На годишна основа, кредитите се повисоки за 6,3%, во поголем дел поради растот на кредитите во странска валута, при забележан раст и на кредитирањето во денари.

Анализирано според намената на кредитите одобрени на физичките лица, во октомври, кај најзастапените категории ‒ потрошувачките и станбените кредити, е забележан месечен раст од 0,3 и 0,8 проценти, соодветно, при годишен раст од 5,9 и 10,4 отсто, соодветно.

Автомобилските кредити, овој месец, се зголемени за 0,8 и 13,2 проценти на месечна и на годишна основа, соодветно, додека кредитите одобрени на кредитни картички бележат месечен и годишен пад од 0,4 и 3,4 отсто соодветно. Во октомври, кај негативните салда на тековните сметки е евидентирано месечно и годишно зголемување од 0,4 и 8,5 проценти, соодветно, додека кредитите одобрени врз други основи се намалени за 1,2 и 17,4 проценти, на месечно и на годишно ниво, соодветно, се наведува во соопштението од Народната банка.