Второ и дополнето издание на монографија за творештвото на сликарот Таки Павловски ќе биде промовирано на 27 март, во 12:30 часот, во Музејот на град Скопје. Изданието е со наслов „Едиција – Таки Павловски – 55 години творештво (1966-2021)“ во 17 тома. Претходното издание на монографијата „Едиција – Таки Павловски – 50 години творештво (1967 – 2017)“ во 10 тома беше објавено во 2018 година.

На промоцијата на новото издание ќе се обратат д-р Панче Велков, директор на Музеј на град Скопје, претставник од Министерството за култура, Корнелија Конеска, директор и куратор на „Остен“, Стевче Јакимовски, градоначалник на Општина Карпош, и Ставре Џиков, публицист. Монографијата е објавена со покровителство на Музеј на град Скопје, Министерство за култура на РСМ, Општина Карпош и Град Скопје.

Куратор на проектот е Емил Алексиев, лектор на изданието е Ана Пановска, преводот на англиски јазик е на Зорица Теофилова, Игор Јанковски, Наташа Папазовска-Левкова, Билјана Николовска-Прлја. Фотографиите во изданието се на Благоја Дрнков и Станимир Неделковски, додека дизајнот и подготовката на монографијата се на Горан Јованов и издавачката куќа „Ројал Арт“ – Скопје. Ангажман и креативно-инвентивни интервенции во едицијата има д-р Марија Павловска.

Покрај промоцијата на изданието, во Музејот на град Скопје од 27 март до 27 април ќе биде поставена изложбата „Таки М. Павловски: Објекти – градби“ (селектирани дела, дел никогаш неизложени).

Таки М. Павловски (12 мај 1939 – 17 мај 2023) оствари значаен придонес во развојот на македонската ликовна уметност и култура и е еден од најистакнатите македонски уметници од својата генерација.